ازيكم
متلخبطين زيي

حاسين بقرف زيي

مش عارفه شويه ابقى مبسوطه وانا شايفه الناس رجعت الميدان بجد تانى
بس لما افتكر ان النهارده اتقسم السوادان احس بقرف خصوصا ان فى ناس مبسوطه انهم خدوا حقهم

حاسه ان نفسي اشد فى شعري من اللى بيقولوه ده


السودان اتقسمت يابشر يعنى كارثه يعنى مصيبه يعنى ربنا يستر


يعنى ياربي مش كفايه مصيبه ليبيا والناتو اللى متنيل ومش عايز يطلع الا لما يستولى على البلد

ولا مصيبه سوريا اللى شكلها هتبقى ليبيا تانى على ازفت واضل سبيلا

كمان السودان
كمان السودان

وايه خيبه وزير خارجيتنا دي اول قرار يقوله وياخده اعترافه باستقلال جنوب السودان

وهو ده حقه يعنى يعترف باسمنا مش هو وزير خارجيه الشعب ده ولا وزير خارجيه نفسه وبيتكلم باسمه

مين اللى اتهبب وقاله اننا موافقين وهل هو ليه ياخد قرار بمزاجه كده
حاجه تقرف بجد


حتى لما كنت مبسوطه بموضوع الناس اللى رجعت الميادين
حصل كام حاجه خليها فى نقط
اولا خطاب عصام شرف جميل وياجماعه عصام شرف مش حسني مبارك


مشكله عصام شرف مش انه كداب لكن فى انه طيب والمرحله اللى احنا فيها مش عايزه واحد طيب عايز واحد يمسك بقبضه من حديد وده نفس الكلام للعيسوى ماينفعش مع وحوش وغيلان الداخليه

بس انا رافضه اننا نشبه عصام شرف بمبارك ولا اى حد تانى فاهمنى طبعا

عصام شرف ده من اشرف الناس فى مصر
لكن نيجي للنقطه التانيه


هل انا زعلانه من المعتصمين بالتاكيد والف فى الميه لا بالعكس ده انا مبسوطه من امبارح هما ليهم حق مايسيبوش المكان الا لما يلاقوا حاجه على ارض الواقع يشوفوها بعينهم ويحسوها بقلبهم ويسمعوها من كل ام شهيد انها راضيه مرتاحه دلوقتى

بس برجوهم بلاش شتيمه فى د عصام شرف وافتكروا انه طالع من الاعتصام وبيحاول على قد مابيقدر لكن البلد خربانه
حسني سايبها خرابه ان كان ماديا ولا معنويا متمثله فى اشخاص زباله ماسكين كل حاجه فى البلد
كل اللى ماسك منصب قيادى زيه زي حسني مبارك الا من رحم علشان يمكن فيهم واحد عدل
وانا بقول يمكن اصلى بصراحه مش مصدقه ان فى حد نزيه كان موجود ايام حسني مبارك



ثالث حاجه مش عارفه اقول حاجه غير يارب وان ربنا يهيئ لمصر امر رشد يعز فيه اهل طاعته ويذل فيه اهل معصيته وهمسه حساها ان عصام شرف بيقولكم خليكم فى التحرير انتوا اللى بتدوله القوه بس ماتشتموش فيه بالعكس ساندوه

وكلنا متاكدين ان عصام شرف زيه زينا كلنا عايز مصر احلى واحسن وتبقى فى مكانها اللى تستاهلها

بحبك يامصر لا بعشقك ياشيخه