الاشتباكات منذ قليل بشارع محمد محمود



ايه اللى بيحصل فى ميدان التحرير ده

مش هختلف انا وانت على انها مدبره وان فى مؤامره واضحه خصوصا انها حدثت بعد حل المجلس المحلى امبارح واعلان المجلس العسكري ان الانتخابات هتبقى فى موعدها وهو سبتمبر اللى جاى

طيب دي اول نقطه لازم نكون متفقين فيها مش معقول الناس عرفت ان فى تكريم لاسر الشهداء فى مسرح البالون وجايين فى اتوبيسات مع بعض طبعا فى حشد حصل وفى حد خلى بلطجيه فى وسطهم

لكن الفكره فى كل مكان فى مصر فى بلطجيه الشرطه هما اول البلطجيه وانا مش هتصالح ولا بتاع


هو معقول اللى مظلوم هو اللى يتصالح مش ممكن ارحمونا شويه

طيب ننقل على النقطه اللى بعدها هو احنا فى حرب اكتوبر واللى حصل كانت الثغره
بمعنى تانى هل ان الشرطه حاميه حمى البلد شافت ان فى الميدان بلطجيه بس شافت برده ان كان فى ناس تانيه هل ده يخليها تضرب فى اهل بلدها


احنا بنلف فى نفس الدايره

احنا مش فى الثغره لما لاقيت ان فى نشطاء وحقوقيين

وفى اهالى شهدا لما سمعوا ان فى ناس منهم بيطالبوا بحقهم وحق ولادهم فى ثوانى كانوا موجودين انتم فاكرين ان اللى حصلهم سهل يعنى

انت ياداخليه لما لاقيت كده تضرب حتى اذا كان فى بلطجيه

وهنا نيجي للنقطه الثالثه وموضوع اهالى الشهدا

طول مافى تاجيل للمحاكمات وطول مالبهوات قاعدين فى بورتو طره وطول مابائس الذكر مبارك قاعد فى مستشفى
7 نجوم وشباب زي الورد بره برقبه مليون من مبارك مش عارف يلاقى سرير فى مستشفى تحت بير السلم يبقى البلد هتفضل كده


وحكايه العداله البطيئه احسن من الظلم السريع ولا مش عارف ايه المقوله الغريبه دى انا ضدها تماما

هو فى شهادات اكتر من كده
اكتر من اللى شفناه فى التليفزيون وعلى النت وشهادات شهود العيان اللى حكااها المعتقلين واللى حكاها اللى كانوا موجودين ف ميدان التحرير
بجد حرام عليكم
حرام على كل اوحد سايب مبارك فى شرم والله العظيم حرام ومايرضيش ربنا
وام الشهيد ولا المصاب ازاى ممكن تسامحكم
حرام بجد اللى بتعملوه ده
اللى حصل فى التحرير امبارح انتوا السبب فيه لسببين الاول زي ماقلت تاخير المحاكمات والتانى متعلق بيه وان كل واحد فى بورتو طره فى عشرين تابع ليه بيكلمه وهو من جوه السجن واللى حصل النهارده يأكد ان فى حد بيدبر

والفيسبوك عطل شويه وتويتر بيعصلج
والاتصالات اتشوشر عليها للى كان فى التحرير كل ده ايه صدفه

كل ده عادى ولا اعتقد اننا رجعنا لمصر مبارك بالتمام والكمال

خلونا نروح للنقطه الرابعه وهى تاكيد للنقطه التالته الامن المركزى المتخلف ده شوفولكم حل فيه هو مش هيتغير ولا ايه

هيفضل برده يضرب فى المتاظهرين ويستعمل قنابل مسيله للدموع بالكثافه اللى كانت النهارده دى



ممكن واحد يعرف حد فى الداخليه يقوله ان الشعب مش اسرائيل والله


حد يعرفهم يمكن عارفين حاجه غلط

ارجوكم بطلوا تتعاملوا معانا كده احنا ماعملناش ثوره علشان سيادتكم تفضلوا زي ماانتم


اخر الكلام

سياده الوزير العيسوى خد اجراء حاسم ارجوك

سياده الدكتور شرف شوف حل للى بيحصل ده لازم تراضي الشهدا حتى بس باعدام حبيب العادلى وعلى فكره انا مش بهزر دى اقل حاجه على فكره اقل من كده يبقى بنهزر فعلا

سياده المجلس العسكري واعضاؤه انتم ازاى سايبين البلد كده
ازاى انت كمجلس عسكري تطنش البلد بالشكل ده وتسيب الناس فى الميدان امبارح فريسه لغباء الامن المركزى
عارفه انك خايف ان يقولوا الجيش ضرب شعبه بس ماهو مش الحل تسيبه للامن المركزى


ربنا يحفظ مصر

بجد اللى حصل النهارده ده يخوف وان كنت بقول يمكن ده يخلى المحاكمات تبقى اسرع واعدل ورب ضاره نافعه

وبرده متفائله رغم انى حزينه من اللى حصل